தைராய்டு பிரச்னைக்கு தவிர்க்க வேண்டிய, சேர்க்க வேண்டிய உணவுகள்..!

தைராய்டு பிரச்னைக்கு தவிர்க்க வேண்டிய, சேர்க்க வேண்டிய உணவுகள்..! 

தைராய்டு உடலுக்குத் தேவையான ஹார்மோன்களை உற்பத்தி செய்யும் நாளமில்லா சுரப்பியே தைராய்டு. இது முன்கழுத்தில் மூச்சுக்குழல் பகுதியில் அமைந்துள்ளது. இதில் சுரக்கப்படும் ஹார்மோன்கள், உடல் வெப்பநிலையை சமநிலையில் வைக்கவும், உடலுக்கு அத்தியாவசியமான வளர்ச்சிதை மாற்றங்களிலும் (Metabolism) முக்கிய பங்கு வகிக்கின்றன. 

இன்றைக்கு அதிகரித்துவரும் உடல்நலப் பிரச்னைகளில், தைராய்டு அனைத்து வயதினரையும் பாதிக்கும் பிரச்னையாக உள்ளது. குறிப்பாக, பெண்களை அதிகம் அச்சுறுத்தக்கூடிய நோய்களில் முக்கியமானதாக தைராய்டு உருவெடுத்துள்ளது. தைராய்டு மிகக் குறைவாக சுரப்பதால் ஏற்படும் பிரச்னையை ஹைப்போதைராய்டிஸம் (Hypothyroidism) என்றும் தைராய்டு அளவுக்கு அதிகமாகச் சுரப்பதால் ஏற்படும் பிரச்னையை ஹைப்பர் தைராய்டிஸம் (Hyperthyroidism) என்றும் மருத்துவர்கள் குறிப்பிடுகிறார்கள். 

அறிகுறிகள் 

தைராய்டு சுரப்பு அதிகமானால் ஆரம்ப நிலையில் உடல் சோர்வாக இருப்பதோடு, உடல் எடை குறையும். பிறகு செயல்பாடுகள் மந்தமாகும். சாதாரணக் குளிரைக் கூடத் தாங்க முடியாத நிலை ஏற்படும். அதேநேரத்தில் தைராய்டு குறைவாக சுரக்கும்போது, திடீரென உடல் எடை அதிகரிக்கும். ஒருவிதமான எரிச்சல், பதற்றம், இதயத்துடிப்பில் மாறுபாடு ஏற்படுவது இதன் முக்கியமான அறிகுறிகளாகும். குறிப்பாக, பெண்களுக்கு முறையற்ற மாதவிலக்கு, கருச்சிதைவு மற்றும் கருத்தரிப்பதில் பிரச்னை என வரிசை கட்டி நிற்கும். 

காரணம் 

உணவில் அயோடின் சத்துக்குறைபாடு, மன அழுத்தம், மரபியல் குறைபாடுகள் போன்றவை தைராய்டு நோய்க்கு முக்கிய காரணமாகின்றன. உணவுப் பொருட்களில் கலந்திருக்கும் அயோடின் சத்து அதிகரித்தால் எந்தவித பாதிப்பும் வராது. எனவே, தைராய்டு நோயாளிகள் நோய்க்கான சிகிச்சை மற்றும் மருந்து, மாத்திரை எடுத்துக் கொள்வதோடு முறையான உணவுப் பழக்கத்தை பின்பற்ற வேண்டியதும் அவசியமாகிறது. அப்படியான உணவுகளில் அவசியம் தெரிந்துகொள்ள வேண்டிய உணவு வகைகள் சிலவற்றை இங்கு பார்க்கலாம்.   

சேர்க்க வேண்டிய உணவுகள் 

முட்டை, வெங்காயம், பீன்ஸ், அவரை, கொத்தவரை, கத்தரிக்காய் பிஞ்சு, வெண்டைக்காய் மற்றும் பிற பந்தல் வகை காய்கள். 

நெல்லிக்காய், கொய்யா, செர்ரிபழம், பெர்ரி வகை பழங்கள், தக்காளி, குடைமிளகாய், மிளகாய் போன்ற வைட்டமின் இ சத்து நிறைந்த உணவுகள் பால் பொருட்களான கொழுப்பு நீக்கிய பால், பாலாடைக்கட்டி, கொதிக்க வைத்த பால் மற்றும் நெய் ஐயோடின் சேர்த்த உப்பு, மீன், நண்டு, இறால், கருவாடு போன்ற கடல் உணவுகள் தோல் நீக்கப்பட்ட கோழி இறைச்சி சிறிதளவு கொம்பு மஞ்சள், மிளகு, சீரகம், பூண்டு போன்ற மசாலா பொருட்கள்

தானியங்கள் : - தானியங்களில் ஓட்ஸ், பார்லி மற்றும் ப்ரௌன் அரிசி போன்ற தோல் நீக்கப்படாத, பளபளப்பு ஏற்றப்படாத முழு தானியங்களில் வைட்டமின் பி உள்ளிட்ட  ஊட்டச்சத்துக்கள் உள்ளன. இந்த சத்துக்களை அதிகம் சேர்த்தால், அவை உடலில் உள்ள மெட்டபாலிசத்தை அதிகரிக்கும். இதனால் தைராய்டு சுரப்பி சீராக இயங்கி, உடலுக்குத் தேவையான தைராய்டு ஹார்மோனை சுரக்க உதவும்.

தவிர்க்க வேண்டிய உணவுகள் 

பாஸ்ட் ஃபுட் 

இன்றைய அவசர யுகத்தில் பாஸ்ட் ஃபுட் முக்கிய உணவாகிப் போய்விட்டது. பாஸ்ட் ஃபுட் உணவுகளில் கெட்ட கொழுப்புகள் அதிகம் இருப்பதால், தைராய்டு உள்ளவர்கள் அவற்றை சிறிது உட்கொண்டாலும், அது தைராக்ஸின் ஹார்மோனின் உற்பத்தியில் பாதிப்பை ஏற்படுத்தும். அதேநேரத்தில் பாஸ்ட்ஃபுட்டில் அதிக அளவு உப்பு பயன்படுத்தப்பட்டிருந்தாலும், அது போதுமான அளவு அயோடின் சத்துகள் கொண்டதாக இருக்காது.  

பதப்படுத்தப்பட்ட உணவுகள் 

பதப்படுத்தப்பட்ட உணவுகள் அதிக அளவு சோடியம் சேர்க்கப்பட்டிருப்பதால் உயர் ரத்த அழுத்தம், இதய நோய்கள் ஏற்பட காரணமாவதுடன், அயோடின் அளவையும் குறைத்துவிடும். 

பேக்கரி உணவுகள் 

பிரெட் போன்ற பேக்கரி வகை உணவுகளில் ஓரளவு அயோடின் இருந்தாலும், செரிமானம் உள்ளிட்ட பிரச்னைகளை ஏற்படுத்தி தைராய்டு சுரப்பில் பாதிப்பை உண்டாக்கும். எனவே பேக்கரிப் பொருட்களை தவிர்ப்பதும் நல்லது.  

சல்பர் உணவுகள் 

சோளம், ஆளி விதை, சர்க்கரைவள்ளிக் கிழங்கு போன்றவற்றில் சல்பர் அதிகம் உள்ளது. மேலும் இந்த உணவுப் பொருட்கள் தைராய்டு சுரப்பியால் அயோடினை உறிஞ்ச முடியாமல் செய்கிறது. எனவே இவற்றைத் தவிர்ப்பதும் நல்லது. 

முட்டைக் கோஸ், காலிஃப்ளவர்... 

முட்டைக்கோஸ், காலிஃப்ளவர், ப்ராக்கோலி போன்ற காய்கறிகள் அயோடின் உறிஞ்சுவதைப் பாதித்து, ஹார்மோன்களில் ஏற்றத்தாழ்வுகளை உண்டாக்கும். எனவே, இந்த காய்கறிகளை தவிர்க்க வேண்டும். 

*  சோயாபீன்ஸ் மற்றும் அது சார்ந்த பொருட்கள். 

*  மரவள்ளி, சர்க்கரைவள்ளி, பசலை, முள்ளங்கி, டர்னிப், மணிலாபயறு போன்றவை கழலை நோய்க்கான வாய்ப்புகளை அதிகப்படுத்தும் உணவுகள். 

*  சிறுதானியங்களை அடிக்கடி பயன்படுத்துபவர்கள், நன்றாக சமைத்த பிறகு அல்லது ஊறவைத்தல், முளைகட்டுதல் போன்ற செயல்கள் மூலமாக அதிலிருக்கும் பாலிபினால்கள், பிற எதிர்சத்துகள் அழிந்த பிறகு உணவில் சேர்க்க வேண்டும். 

*  கடுகு அதிகம் சேர்த்த உணவுகள், ஆடு மற்றும் மாட்டிறைச்சி, ஊக்கமருந்து கொடுக்கப்பட்ட அசைவ உணவுகள், வெண்ணெய், காபி மூங்கில் உணவுகள், அதிக பூச்சிக்கொல்லி பயன்படுத்தி வளர்க்கப்பட்ட தாவர உணவுகள், மரபணு மாற்றம் செய்யப்பட்ட உணவுகள். 

தைராய்டுக்கு வாழ்க்கை முழுக்க மாத்திரை சாப்பிட வேண்டும் என்கிற அவசியம் கிடையாது. இந்த உணவுமுறையோடு தைராய்டு மாத்திரையையும் சேர்த்து எடுத்து, 

மாத்திரையின் அளவை படிப்படியாகக் குறைத்து, ஒரு கட்டத்தில் தைராய்டின் சுரக்கிற அளவு சரியாக இருந்தால் மாத்திரையை நிறுத்திவிடலாம்.

Share: